کراچی نیوز لیب رپورٹ ) وزیراعلیٰ سندھ وزیراعلیٰ سندھ مراد علی شاہ نے کہا ہے کہ پنجاب اسمبلی نیا صوبہ بنانے کےلیے قراردادیں منظور جبکہ سندھ اسمبلی صوبے کی تقسیم کے خلاف کئی قراردادیں منطور کرچکی ہے، مریم نواز سندھ میں آکر الیکشن لڑیں،آرٹس کونسل کراچی میں قومی یوم اقلیت کے حوالے سے منعقدہ کانفرنس کے بعد میڈیا سے گفتگو کرتے ہوئے مراد علی شاہ نے کہا کہ میر رضا کیس کی منصفانہ تفتیش ہوگی اور ہر مرحلے سے فیملی کو آگاہ کیا جائےگا، کیس حل ہونے کے بعد پولیس اور میڈیکو لیگل کی کوتاہیوں پر کارروائی کرنا میرا کام ہے۔ جوڈیشل کمیشن کیس کی تفتیش کےلیے نہیں بنا رہے تھے، وہ پولیس کا کام ہے، جوڈیشل کمیشن پولیس اور میڈیکو لیگل کی کوتاہیوں کی نشاندہی کےلیے بنایا جا رہا تھا۔ وزیراعلیٰ سندھ نے بتایا کہ کمیشن بنانے سے پہلے انہوں نے وزیرداخلہ اور میئر کراچی کو میر رضا کے والدین کے پاس بھیجا اور انہوں نے بھی کہا تھا کہ ٹھیک ہے لیکن اگلے توز جب فیملی نے کہا کہ ہم جوڈیشل کمیشن نہیں چاہتے تو ہم نے ان کی رائے کا احترام کیا۔ نئے صوبوں کے حوالے سے سوال کا جواب دیتے ہوئے وزیراعلیٰ سندھ نے کہا کہ وہ پہلے بھی پہلے بھی کہہ چکے ہیں کہ آئین میں صوبہ بنانے کا طریقہ کار موجود ہے، سندھ اسمبلی صوبے کی تقسیم کے خلاف کئی قراردادیں منطور کرچکی ہے اور انہیں نہیں لگتا کہ موجودہ یا مستقبل کی اسمبلی میں کوئی نیا صوبہ بنانے کےلیے دو تہائی اکثریت حاصل کر سکتی ہے۔ انہوں نے کہا کہ سندھ کے عوام ہم پر بھروسہ رکھتے ہیں، میڈیا بھی بھروسہ رکھے۔پیپلزپارٹی پر تنقید کا جواب دیتے ہوئے مراد علی شاہ نے کہا کہ پیپلزپارٹی پر الزام ہے ہمارا سندھ میں موقف الگ ہے، پنجاب میں الگ لیکن ہم پنجاب میں صوبہ بنانے کی بات اس لیے کرتے ہیں کہ پنجاب اسمبلی نیا صوبہ بنانے کےلیے قراردادیں منظور کرچکی ہے۔ مریم نواز کی جانب سے سندھ کے عوام کی خدمت سے متعلق بیان اور حکومت سندھ پر تنقید کے حوالے سے سوال کے جواب میں وزیراعلیٰ سندھ نے کہا کہ پنجاب والوں کو اگر سندھ کی زیادہ فکر ہے تو آئینی طریقہ کار اختیار کریں، آئیں سندھ میں اپنا ووٹ رجسٹرڈ کرائیں الیکشن لڑیں، اگر عوام نے آپ کو سپورٹ کیا تو ان کی خدمت کریں ورنہ اپنی پارٹی سے کہیں کہ وفاقی حکومت میں آپ کو وزیر اعظم نامزد کرے اور آپ وفاق کے ذریعے سندھ کی خدمت کریں۔ مشترکہ مفادات کونسل کا اجلاس نہ بلائے جانے سے متعلق ایک سوال کے جواب میں وزیراعلیٰ نے کہا کہ نوے روز میں اجلاس بلانا آئینی تقاضہ ہے۔ صحافی اب وفاقی حکومت سے سوال کریں کہ ہمارے مطالبے کے باوجود اجلاس کیوں نہیں بلایا جا رہا۔ پریا کماری کی بازیابی کے حوالے سے ایک سوال کے جواب میں وزیراعلیٰ سندھ نے اعتراف کیا کہ اب تک کوئی کامیابی نہیں مل سکی ہے، انہوں نے بتایا کہ ایک دو مرتبہ اطلاعات ملیں لیکن اس سے کچھ حاصل نہیں ہوسکا۔
