کراچی ( نیوز لیب رپورٹ ) سندھ حکومت نے مہران ہائی وے پر ٹول ٹیکس نافذ کر دیا ، 135 کلو میٹر طویل مہران ہائی وے جو کہ نواب شاہ سے رانی پور تک جاتی ہے اور نوابشاہ، نوشہرو فیروز اور خیرپور اضلاع کو آپس میں ملاتی ہے پر ٹول ٹیکس کا اطلاق بنیادی طور پر بھاری اور تجارتی گاڑیوں پر ہوگا،سندھ حکومت کے مطابق ٹول ٹیکس کا مقصد مہران ہائی وے کی مرمت، بحالی اور دیکھ بھال کے لیے مستقل مالی وسائل فراہم کرنا ہے،مہران ہائی وے سے روزانہ 22 ہزار سے زائد گاڑیاں گذرتی ہیں ، اس لئے ٹول ٹیکس نظام سے سالانہ 2 ارب 14 کروڑ روپے مجموعی آمدنی حاصل ہونے کی توقع ہے، آپریشنل اخراجات کے بعد ٹول ٹیکس سے سالانہ ایک ارب 48 کروڑ روپے خالص آمدنی کا تخمینہ لگایا گیا ہے ،سندھ حکومت ذرائع کے مطابق ٹول ٹیکس کی منظوری سندھ حکومت کا شاہراہوں کی پائیدار دیکھ بھال کے لیے خود کفیل مالیاتی نظام متعارف کرانے کی پالیسی کا حصہ ہے ، واضح رہے کہ حکومت سندھ کی جانب سے مہران ہائی وے کو دو رویہ بنانے کا منصوبہ 41 ارب روپے کی لاگت سے جاری ہے،ٹول ٹیکس سے حاصل ہونے والی رقم صرف مہران ہائی وے کی دیکھ بھال، مرمت، بحالی اور بہتری پر خرچ کی جائے گی
