کراچی(نیوزلیب رپورٹ ) سندھ پولیس کے کاونٹر ٹیرر ازم ڈیپارٹمنٹ ( سی ٹی ڈی ) نے دعویٰ کیا ہے کہ اس نے مولانا عبداللہ ،مولانا احمد مدنی، مفتی جمیل اور مفتی شامزئی کی ٹارگٹ کلنگ میں ملوث مرکزی ملزم کالعدم دہشت گرد تنظیم سے وابستہ سید محمد عسکری عابدی کو گرفتار کرلیا ہے ،پولیس کے مطابق گرفتار دہشت گرد کافی عرضے سے روپوش تھا ،۔ سی ٹی ڈی کے مطابق گرفتار ملزم کے قبضے سے ہینڈ گرنیڈ اور کلاشنکوف برآمد ہوئی ہے جبکہ اس کا نام سی ٹی ڈی ریڈ بک کے دسویں ایڈیشن میں انتہائی مطلوب افراد کی فہرست میں شامل تھا۔سی ٹی ڈی کے مطابق ملزم طویل عرصے سے روپوش تھا اور کراچی میں دوبارہ اپنا نیٹ ورک منظم کرنے کی کوشش کر رہا تھا۔ ابتدائی تفتیش کے دوران ملزم کے دہشت گردی اور ٹارگٹ کلنگ کی مختلف وارداتوں میں ملوث ہونے کے انکشافات سامنے آئے ہیں۔حکام کے مطابق ملزم نے اپنے دیگر ساتھیوں کے ہمراہ مختلف وارداتوں میں ملوث ہونے کا اعتراف کیا ہے۔ ملزم اور اس کے ساتھی مبینہ طور پر پہلے اپنے اہداف کی ریکی کرتے اور اس کے بعد انہیں نشانہ بناتے تھے۔سی ٹی ڈی کے مطابق گرفتار ملزم کے خلاف کراچی کے مختلف تھانوں میں ٹارگٹ کلنگ کے مقدمات درج ہیں،سی ٹی ڈی حکام کے مطابق گرفتار ملزم سے مزید تفتیش اور مشترکہ تحقیقاتی عمل جاری ہے، جس کے دوران اس کے دیگر ساتھیوں، سہولت کاروں اور مبینہ نیٹ ورک سے متعلق معلومات حاصل کی جا رہی ہیں۔ ملزم کے انکشافات کی روشنی میں دیگر مطلوب افراد کی گرفتاری کے لیے بھی کارروائیاں جاری ہیں۔
