پی آئی اے میں سب سے بڑا شیئرز ہولڈر فوجی فرٹیلائزر ہے،عارف حبیب کا انکشاف

کراچی ( نیوزلیب رپورٹ )پی آئی اے میں اب سب سے بڑا شیئر ہولڈر فوجی فرٹیلائزر ہے، یہ انکشاف چیئرمین عارف حبیب گروپ عارف حبیب نے پاکستان اسٹاک ایکس چینج میں پی آئی اے کی نجکاری کے جشن پر منعقدہ گونگ بیل تقریب سے خطاب میں کیا ،تقریب میںوزیرِ اعظم کے مشیر برائے نجکاری محمد علی مہمان خصوصی کے طور پر شریک تھے عارف حبیب نے کہا کہ عارف حبیب اور فاطمہ گروپ دونوں ملکر پی آئی اے میں 34 فیصدکے حصہ دار ہیں جبکہ صرف فوجی فرٹیلائزر پی آئی اے میں 33.9 فیصد کی حصہ دار ہے ، انہوں نے مزید کہا کہ ہم پی آئی اے میں 20 نئے جہاز شامل کرنے کیلئے ایئر بس اور بوئنگ کمپنی سے مذاکرات کر رہے ہیں، ایئر بس اور بوئنگ دونوں نے ہمیں 10 سال پرانے جہاز جلدی دینے کا وعدہ کیا ہے ،۔چیئرمین عارف حبیب گروپ،کا کہنا تھا کہ پی آئی اے کی ٹرانزیکشن 180 ارب روپے تاریخ کی سب سے بڑی ٹرانزیکشن ہے۔ پی آئی اے کی نجکاری کا جشن پاکستان اسٹاک ایکس چینج میں ہی منانا ضروری تھا۔انہوں نے کہا کہ پی آئی اے کی نجکاری کے اسٹرکچر سے متعلق کافی سوالات اٹھے کہ محض 10ارب روپے ادا کیے گئے۔ ہم نے 55ارب روپے ادا کرنے کی یقین دہانی کروائی۔125 ارب روپے پی آئی اے کی ترقی پر خرچ کیے جائیں گے،اس موقع پر اے کے ڈی گروپ کے چیئرمین عقیل کریم ڈھیڈی نے پی آئی اے کی نجکاری کو ایک مثالی معاہدہ قرار دیتے ہوئے کہا:“پی آئی اے کی نجکاری سرکاری اداروں میں سب سے بہترین انداز میں مکمل کی جانے والی نجکاری کے طور پر نمایاں ہے۔ میں خاص طور پر سابق نگران وزیرِ خزانہ ڈاکٹر شمشاد اختر کو خراجِ تحسین پیش کرتا ہوں جنہوں نے پی آئی اے کی ضمانتوں کی تنظیمِ نو کی، جس سے اس کامیابی کی راہ ہموار ہوئی۔ اسی طرح وزیراعظم کے مشیر برائے نجکاری، محمد علی کی قیادت اور وژن نے اس تاریخی معاہدے کو آگے بڑھانے میں کلیدی کردار ادا کیا۔ ان کے عزم، اسٹریٹجک رہنمائی اور سرمایہ کاروں کے اعتماد کو مضبوط بنانے کی صلاحیت کے بغیر یہ کامیابی ممکن نہ تھی۔ آئندہ کے لیے ضروری ہے کہ پائیدار اصلاحات کو یقینی بنانے کے لیے کیپیٹل مارکیٹ کے اسٹیک ہولڈرز کے ساتھ پالیسی مشاورت کا عمل جاری رکھا جائے۔