کراچی ( نیوز لیب رپورٹ )میڈیکل کی تعلیم کے لئے حکومت کی نئی پالیسی، طلبا و طالبات کے لئے ڈاکٹر بننا مزید مشکل ہو گیا ،حکومت نے بیرونِ ملک میڈیکل وڈینٹل تعلیم سے قبل طلبا و طالبات کیلئے پی ایم اینڈ ڈی سی رجسٹریشن لازمی قراردے دی،اب ایم ڈی کیٹ پاس کئے بغیر بیرونِ ملک بھی میڈیکل تعلیم حاصل کرنے کی اجازت نہیں ہو گی، طبی تعلیم کے نظام میں اصلاحات کا اعلان۔ نئی پالیسی کے مطابق طلبا و طالبات کے لیے صرف ان غیر ملکی اداروں میں داخلہ لینا ممکن ہوگا جو پی ایم اینڈ ڈی سی کی منظور شدہ فہرست میں شامل اور ڈبلیو ایف ایم ای سے تسلیم شدہ ہوں۔ میڈیکل گریجویٹس کے لیے وطن واپسی پر نیشنل رجسٹریشن امتحان پاس کرنا بھی لازمی قرار دیا گیا ہے۔ غیر انگریزی زبان والے ممالک میں جانے والے طلبہ کو ہدایت کی گئی ہے کہ وہ پہلے مقامی زبان سیکھیں، جبکہ روانگی سے قبل رہائش اور رابطہ معلومات کی فراہمی بھی یقینی بنانا ہوگی۔ یہ فیصلے قومی میڈیکل و ڈینٹل کالجز کمیٹی اجلاس میں کئے گئے، کمیٹی کا اجلاس منگل کو منعقد ہواجس میں پاکستان میں میڈیکل اور ڈینٹل تعلیم کے نظام کو مزید مؤثر اور مضبوط بنانے کے لئے جاری اصلاحات اور ریگولیٹری اقدامات کا جائزہ لیا گیا۔ اجلاس کے دوران میڈیکل اور ڈینٹل کالجز کے انڈرگریجویٹ اور پوسٹ گریجویٹ پروگرامز کے انسپکشن کے طریقہ کار پر تفصیلی غور کیا گیا۔ کمیٹی نے اداروں کے شفاف، منصفانہ اور میرٹ پر مبنی انسپکشن کے لئے جاری کوششوں پر پی ایم ڈی سی کو سراہا۔ کمیٹی کے اراکین کو اب تک متعارف کرائی گئی نئی اصلاحات، جدید طریقہ کار اور انسپکشن کے معیار اور ساکھ کو بہتر بنانے کے اقدامات پر بریفنگ دی گئی۔کمیٹی نے اس بات پر زور دیا کہ انسپکشن کے معیار اور طریقہ کار پر کسی قسم کا سمجھوتہ نہیں کیا جائے گا اور غفلت، بے ضابطگی یا قواعد کی خلاف ورزی کے حوالے سے زیرو ٹالرنس پالیسی اپنائی جائے گی۔ اجلاس کے شرکاء نے اس امر پر زور دیا کہ پاکستان میں صحت کے شعبے کے مستقبل کو محفوظ بنانے کے لئے میڈیکل اور ڈینٹل تعلیم کے اعلیٰ ترین معیارات کو برقرار رکھنا ناگزیر ہے،اس لئے اب بیرونِ ملک میڈیکل یا ڈینٹل تعلیم حاصل کرنے کے خواہشمند تمام طلبہ کے لئے ایم ڈی کیٹ امتحان میں کامیابی حاصل کرنا اور بیرونِ ملک روانگی سے قبل پی ایم ڈی سی سے رجسٹریشن کرانا لازمی ہوگا تاکہ مستقبل میں ڈگری کی منظوری، لائسنسنگ یا رجسٹریشن کے حوالے سے کسی قسم کی دشواری کا سامنا نہ کرنا پڑے۔کمیٹی نے اس بات پر بھی زور دیا کہ طلبہ داخلہ لینے سے قبل اس امر کی تصدیق کریں کہ متعلقہ غیر ملکی میڈیکل ادارہ پی ایم اینڈ ڈی سی کی منظور شدہ غیر ملکی اداروں کی فہرست میں شامل ہے۔ مزید برآں ادارے کا ورلڈ فیڈریشن فار میڈیکل ایجوکیشن سے منظور شدہ ہونا یا ورلڈ ڈائریکٹری آف میڈیکل سکولز میں شامل ہونا لازمی ہوگا۔میڈیکل تعلیم کم از کم پانچ سالہ دورانیے پر مشتمل ہوگی ،کمیٹی نے یہ بھی ہدایت کی کہ جن ممالک میں تدریس کا ذریعہ انگریزی نہیں ہے وہاں طلبہ کو طبی تعلیم شروع کرنے سے قبل کم از کم پانچ ماہ مقامی زبان سیکھنے میں صرف کرنا ہوں گے تاکہ مؤثر رابطے اور تعلیمی فہم کو یقینی بنایا جا سکے
