کراچی ( نیوز لیب رپورٹ)ٹیکس چوری کا الزام ، سندھ ریونیو بورڈ (ایس آر بی) نے حیدرآباد کے علاقے لطیف آباد میں واقع بروہی بلوچستان بار بی کیو ریسٹورنٹ سیل کر دیا ہے۔سندھ ریونیو بورڈ (ایس آر بی) کے مطابق ٹیکس قوانین پر عمل نہ کرنے اور ٹیکس چوری کے الزام میں ریسٹورنٹ کو سیل ( سربمہر ) کیا گیا ، پوائنٹ آف سیل (پی او ایس ) سسٹم سے متعلق بے ضابطگیوں، غلط رسیدوں کے اجرا، اور فروخت کو کم ظاہر کرنے کے باعث سندھ سیلز ٹیکس کی آمدن میں نمایاں نقصان ظاہر کرنے پر یہ کاروائی کی گئی، ریسٹورنٹ کو پہلے کئی مرتبہ خبردار کیا گیا اور باقاعدہ نوٹس جاری کیے گئے تھے جن میں ایسی بے ضابطگیوں کو روکنے کی ہدایت دی گئی تھی،لیکن ریسٹورنٹ انتظامیہ نے اپنی پریکٹس جاری رکھی،اور پی او ایس سسٹم کی خلاف ورزی کا سلسلہ جاری رہا ،اس طرح ہوٹل انتظامیہ نے فروخت کم ظاہر کرکے بڑے پیمانے پر ٹیکس چوری کی ،ریسٹورنٹ انتظامیہ کی مسلسل عدم تعمیل کو دیکھتے ہوئے ایس آر بی افسران نے اپنے قانونی اختیارات استعمال کرتے ہوئے قانون کے مطابق ریسٹورنٹ کےکاروباری احاطے کو سیل کر دیا۔ایس آر بی نے واضح کیا ہے کہ یہ کارروائی ان ریسٹورنٹس اور کاروباروں کے خلاف وسیع اور مسلسل مہم کا حصہ ہے جو اپنی اصل فروخت چھپاتے ہیں، اپنے پی او ایس سسٹمز کو ایس آر بی کے آن لائن پلیٹ فارم سے منسلک نہیں کرتے، یا ایسی رسیدیں جاری کرتے ہیں جو ایس آر بی-پی او ایس آن لائن نظام سے باہر ہوں۔ریونیو اتھارٹی نے خبردار کیا ہے کہ صوبے بھر میں ایسے تمام کاروباروں کے خلاف بلاامتیاز اور بغیر کسی نرمی کے اسی نوعیت کی کارروائیاں جاری رکھی جائیں گی۔ ایس آر بی کے مطابق آنے والے دنوں میں ٹیکس قوانین پر عمل نہ کرنے والے کاروباروں کے خلاف اپنی کارروائیاں مزید تیز کی جائیں گی
