کراچی ( نیوز لیب رپورٹ) پاکستانی شو باز دولت مند جوکہ پرتعیش اورعیش و عشرت کی زندگی گذار رہے ہیں لیکن اپنی آمدنی پر حکومت کو ٹیکس ادا نہیں کرتے ،ایف بی آر نے ان کے گرد گھیرا تنگ کرنے کے لئے سوشل میڈیا کی نگرانی شروع کر دی ہے ،میڈیا رپورٹس کے مطابق فیڈرل بورڈ آف ریونیو (ایف بی آر) میں اس مقصد کے لئے ’’لائف اسٹائل مانیٹرنگ سیل‘‘ قائم کیا گیا ہے جوکہ سوشل میڈیا پر فضول خرچ اور شاہانہ پوسٹ ڈالنےوالے افراد کی نشاندہی کرے گا، ایف بی آر کے اس خصوصی سیل نے ،فیس بک، انسٹاگرام، ٹک ٹاک اور یوٹیوب پر پوسٹس کا جائزہ لینا شروع کر دیا ہے،تاکہ وہ افراد اور شخصیات جوکہ بڑی بڑی گاڑیوں، غیر ملکی دوروں ، کی تشہیر کرتے ہیں یا پھر شادی بیاہ کی مہنگی ترین تقریبات کا انعقاد کیا جاتا ہے ، بچوں کی تقریبات اور سال گرہ یا ڈانس وغیرہ کی پارٹیوں میں نوٹ نچھاور کرتے نظر آتے ہیں ،ان افراد کا ڈیٹا لیکر چیک کیا جائے ، اگر وہ ٹیکس نیٹ میں نہیں ہیں تو انھیں ٹیکس نیٹ میں لایا جائے اور اگر ٹیکس نیٹ میں ہیں لیکن ان کے مالی گوشواروں ان کے طرزِ زندگی سے مطابقت نہیں رکھتے تو ان کے خلاف ٹیکس چوری کے کیس بنائیں جائیں
،ایف بی آر حکام کا کہنا ہے کہ یہ مانیٹرنگ سیل ایک ماہ قبل ہی قائم کیا گیا ہے۔ اس کے مینڈیٹ میں شامل ہے کہ وہ”اہم سوشل میڈیا پلیٹ فارمز سے ڈیٹا کو منظم انداز میں مانیٹر، جانچ اور تجزیہ کرے، اور ایسے افراد کی نشاندہی کرے جو دولت کی نمائش کرتے ہیں مگر یا تو ٹیکس کے لیے رجسٹرڈ نہیں یا ان کی آمدنی ان کے اخراجات اور اثاثوں سے مطابقت نہیں رکھتی۔”دستاویز کے مطابق یہ سیل مشتبہ افراد کے ڈیجیٹل پروفائلز تیار کرے گا، ان کے طرزِ زندگی کے پیچھے موجود رقوم کا اندازہ لگائے گا، اور ایسی رپورٹس تیار کرے گا جو ٹیکس یا منی لانڈرنگ کی تحقیقات میں استعمال ہو سکیں۔اس میں شواہد کا مرکزی ڈیٹا بیس رکھا جائے گا، جس میں اسکرین شاٹس اور ٹائم اسٹیمپس شامل ہوں گے،ایف بی آر حکام کے مطابق ’’لائف اسٹائل مانیٹرنگ سیل‘‘ بیورو کریسی اور چند اہم محکموں کے اہلکاروں کی بھی نگرانی کرے گا،خصوصی سیل کی ٹیم نے بڑی بڑی قیمتی گاڑیوں، مہنگی جائیدادوں کے وی لاگز، اور انفلوئنسرز کی پرتعیش طرزِ زندگی سے متعلق ویڈیوز کا بھی جائزہ لیا ہے ،اور کئی افراد کی فہرست بھی تیار کی ہے ، حکام کے مطابق متعدد فائلیں مزید چھان بین کے لیے شارٹ لسٹ کر لی گئی ہیں،ایف بی آر ذرائع کے مطابق سوشل میڈیا پر توجہ مرکوز کرنے سے تیز رفتار نتائج حاصل ہو رہے ہیں۔
