کراچی (نیوز لیب رپورٹ) سوشل میڈیا جھوٹی خبریں پھیلا رہا ہے ،دکانداروں سے 5500روپے ماہانہ وصولی کی رسیدیں جعلی ہیں ،گل پلازہ مینجمنٹ کمیٹی کے صدر کے صدر تنویر پاستا نے سوشل میڈیاپر دکانداروں سے 5500روپے ماہانہ وصولی کی رسیدوں کو جعلی قرار دیتے ہوئے کہا ہے کہ یہ خبر اور رسید 100 فیصد جھوٹی ہے اور اتنی رقم وصول نہیں کی جا رہی ہے ۔ سانحہ گل پلازہ کے بعد ایک تصویر کے ساتھ یہ خبر وائرل ہو رہی ہے جس میں بتایا جا رہا ہے کہ گل پلازہ مارکیٹ ایسوسی ایشن دکانداروں سے ماہانہ 5500 روپے فی دکان مینٹیننس کی مد میں وصول کرتے ہیں۔ اس خبر کے ساتھ رسید کی تصویر بھی ہے، جس میں صدر ایسوسی ایشن پاستا کے نام سے دستخط بھی موجود ہیں۔سوشل میڈیا پر اس خبر کے ساتھ ہی یہ سوال بھی اٹھایا جا رہا ہے کہ دکانداروں سے مینٹیننس کی مد میں مجموعی طور پر ماہانہ 66 لاکھ وصول کرنے والی ایسوسی ایشن پلازہ میں فائر الارم بھی کیوں نہ لگا سکی،تاہم دوسری جانب گل پلازہ کے صدر تنویر پاستا کا موقف ہے کہ یہ خبر اور رسید 100 فیصد جھوٹی ہے اور اتنی رقم وصول نہیں کی جا رہی۔تنویر پاستا نے بتایا کہ سوشل میڈیا پر وائرل رسید کی تصویر کے نیچے میرے نام کے دستخط ہیں۔ اگر میں کوئی فراڈ کروں گا تو رسید پر دستخط کیوں کروں گا۔ دوسری بڑی غلطی یہ ہے کہ اس رسید پر گل پلازہ مارکیٹ ایسوسی ایشن لکھا ہے جب کہ ہماری یونین کا نام گل پلازہ منیجمنٹ کمیٹی ہے۔انہوں نے گل پلازہ منیجمنٹ کمیٹی کی رسید دکھاتے ہوئے کہا کہ حقیقت یہ ہے کہ پلازہ کی ہر دکان سے ماہانہ مینٹیننس کی مد میں صرف 1500 روپے وصول کیے جاتے ہیں۔تاجر رہنما نے کہا کہ سانحے کے بعد میڈیا کے کئی نمائندے بھی یہاں آئے اور انہوں نے دکانداروں سے پوچھا کہ مینٹیننس کی مد میں کتنا لیا جاتا ہے تو انہوں نے بھی تصدیق کی کہ ماہانہ 1500 روپے ہی لیے جاتے ہیں۔
