کراچی ( نیوزلیب رپورٹ)پاکستان میں 78 سال بعد بھی عوام کو صاف پانی دستیاب نہیں، ناقص پانی ملک بھر میں رپورٹ ہونے والی تقریباً 30 فیصد بیماریوں کا باعث بنتا ہے، ناقص معیار کا پانی ملک میں سالانہ اموات کے تقریباً 40 فیصد کا سبب بنتا ہےجبکہ یہ اسہال شیر خوار اور کم عمر بچوں میں اموات کی سب سے بڑی وجہ ہے، کراچی میں غیر معیاری پانی سےخطرناک بیکٹیریا پھیل رہا ہے ،ہر پانچواں پاکستانی پانی سے پیدا ہونے والی کسی نہ کسی بیماری میں مبتلا ہے، یہ ہوشربا انکشافات پاکستان میڈیکل ایسوسی ایشن کی جانب سے ہیلتھ آف نیشن کے نام سے جاری رپورٹ میں کئے گئے ہیں ،ایسوسی ایشن نے چند روز قبل کینسر ڈے کے موقع پر جاری رپورٹ میں بتایا ہے کہ پاکستان میں اس وقت سالانہ 185,000 سے زائد نئے کینسر کیسز رپورٹ ہو رہے ہیں،پی ایم اے نے ملک کی صحت کی صورتِ حال کی تشویشناک تصویر پیش کی ہے ۔رپورٹ کے مطابق پاکستان میں روزانہ 675 نوزائیدہ بچے اور 27 مائیں قابلِ تدارک وجوہات کی بنا پر جان سے ہاتھ دھو بیٹھتی ہیں۔ ناقص معیار کا پانی ملک میں سالانہ اموات کے تقریباً 40 فیصد کا سبب بنتا ہے۔ پاکستان عالمی سطح پر ہیپاٹائٹس سی کا سب سے زیادہ بوجھ اٹھا رہا ہے، ایشیا میں بریسٹ کینسر کی بلند شرح رکھتا ہے جبکہ جنوبی ایشیا میں دل کے امراض کی سب سے زیادہ شرح بھی یہاں پائی جاتی ہے۔رپورٹ میں کہا گیا ہے کہ ناقص پانی ملک بھر میں رپورٹ ہونے والی تقریباً 30 فیصد بیماریوں کا باعث بنتا ہے۔ہر پانچواں پاکستانی پانی سے پیدا ہونے والی کسی نہ کسی بیماری میں مبتلا ہے، جس سے پہلے ہی دباؤ کا شکار نظامِ صحت پر مزید بوجھ پڑ رہا ہے۔رپورٹ کے مطابق ایک تشویشناک پیش رفت کراچی اور اندرونِ سندھ کے بعض علاقوں میں ایکس ڈی آر ٹائیفائیڈ کا پھیلاؤ ہے۔ یہ سالمونیلا ٹائیفی بیکٹیریا کی وہ قسم ہے جو ٹائیفائیڈ بخار کا سبب بنتی ہے اور عام ادویات کے خلاف شدید مزاحمت رکھتی ہے۔ یہ بیماری آلودہ پانی اور خوراک کے ذریعے پھیلتی ہے۔ اینٹی بایوٹکس کے بے جا اور غیر منظم استعمال نے ابتدائی درجے کے علاج کے خلاف مزاحمت میں اضافہ کر دیا ہے، جس کے باعث اس مرض پر قابو پانا مزید مشکل ہو گیا ہے اور پانی کی آلودگی کو جڑ سے ختم کرنے کی فوری ضرورت کو اجاگر کیا گیا ہے۔رپورٹ میں ملک میںکہا گیا ہے کہ پاکستان میں ایچ آئی وی کی صورتِ حال بھی تشویش ناک ہے، پاکستان خطے میں ایچ آئی وی کی سب سے تیزی سے بڑھتی ہوئی وبا کا سامنا کر رہا ہے۔گزشتہ 15 برسوں میں نئے ایچ آئی وی کیسز میں 200 فیصد اضافہ ہوا ہے (2010 میں 16 ہزار کیسز سے بڑھ کر 2024 میں 48 ہزار تک)۔ اندازاً پاکستان میں 3 لاکھ 50 ہزار افراد ایچ آئی وی کے ساتھ زندگی گزار رہے ہیں، تاہم تقریباً 10 میں سے 8 افراد کو اپنی بیماری کی تشخیص کا علم ہی نہیں۔رپورٹ کے مطابق بچے بھی بڑھتی ہوئی تعداد میں متاثر ہو رہے ہیں اور مختلف اضلاع میں حالیہ وباؤں کو صحت کے مراکز میں غیر محفوظ انجیکشنز اور خون کی منتقلی سے جوڑا گیا ہے۔رپورٹ میں ادویات کی قیمتوں میں بے قابو اضافے اور زندگی بچانے والی ضروری ادویات کی مسلسل قلت پر بھی توجہ دی گئی ہے، جسے ایک بڑا عوامی صحت کا ہنگامی مسئلہ قرار دیا گیا ہے۔رپورٹ کے مطابق 80 ضروری جان بچانے والی ادویات بشمول انسولین کی قلت دستاویزی شکل میں موجود ہے،پی ایم اے نے مطالبہ کیا کہ حکومت فوری طور پر قومی سطح پر صحت کی ایمرجنسی نافذ کرے، صحت کے بجٹ کو جی ڈی پی کے کم از کم تین فیصد تک بڑھانے کا اعلان کرے، جان بچانے والی ادویات کی قیمتیں منجمد کرے اور بلیک مارکیٹ کے خلاف کریک ڈاؤن شروع کرے۔انہوں نے مزید کہا کہ صاف پینے کے پانی کی فراہمی کو قومی سلامتی کی ترجیح قرار دیا جائے تاکہ ہیپاٹائٹس اور ٹائیفائیڈ جیسی وباؤں کے شیطانی چکر کو توڑا جا سکے۔
