کراچی ( نیوزلیب رپورٹ ) متحدہ عرب امارات کی جانب سے2 ارب ڈالر واپس مانگنے سےاہل پاکستان پریشان نہ ہوں ،آنے والے 2 ہفتے میں بہت بڑا سرمایہ پاکستان آنے والا ہے، یہ دعویٰ وفاقی وزیر برائے سرمایہ کاری بورڈ قیصر احمد شیخ نے ایک انٹرویو میں کیا ہے ،میڈیا رپورٹس کے مطابق بزنس کمیونٹی سے تعلق رکھنےوالے وفاقی وزیر قیصر احمد شیخ نے کہا کہ دنیا اس وقت شدید بحران کی زد میں ہے ، مشرق وسطیٰ میںجاری جنگ اب چھٹے ہفتے میں داخل ہو چکی ہے،تاہم امید کی جا رہی ہے یہ جنگ مزید 2ہفتوں سے زیادہ نہیں چلے گی، جنگ ختم ہوتے ہی عالمی حالات اور معیشت تیزی سے بہتری کی طرف گامزن ہوں گے۔قیصر احمد شیخ نے انکشاف کیا کہ حکومت کو سخت معاشی حالات کے باعث ترقیاتی پروگرام کے فنڈز میں سے 100ارب روپے مجبورا کم کرنا پڑے، یہ کٹوتی مالیاتی نظم و ضبط برقرار رکھنے کیلئے کی گئی ہے۔وفاقی وزیر نے بتایا کہ حکومت نے گزشتہ روز موٹر سائیکل سواروں کو مہنگے پیٹرول کے اثرات سے محفوظ رکھنے کیلئے خصوصی رعایت دی ہے، اس اقدام کا مقصد عام آدمی پر بوجھ کم کرنا ہے۔وفاقی وزیر نے کہا کہ میں دیکھ رہا ہوں اگلے 15دن کے اندر بہت بڑا سرمایہ پاکستان واپس آنے والا ہے، جس سے ملکی معیشت کو استحکام ملے گا،اس لئے زیادہ پریشان ہونے کی ضرورت ہیں ،نیوزلیب ذرائع کے مطابق ایک دوست ملک نے یو اے ای کے پیسے واپس کرنے کے ساتھ ہی اس سے ڈبل رقم پاکستان میں جمع کرانے کی یقین دہانی کرا دی ہے جس سے ملکی معیشت پر مثبت اثرات مرتب ہو نگے
