کراچی ( نیوز لیب رپورٹ)نشاط گروپ ،لکی گروپ ، اور ماسٹر گروپ کے بعد برطانیہ کے معروف بزنس مین سر انور پرویز کے بیسٹ وے سیمنٹ نے بھی پاکستان کے آٹو سیکٹر میںقدم رکھنے کا اعلان کر دیا ہے ، کمپنی کی جانب سے پاکستان اسٹاک ایکس چینج کو بھیجے گئے ایک نوٹس میں بتایا ہے کہ بیسٹ وے سیمنٹ نے آٹو سیکٹر میں 10 ارب روپے کی سرمایہ کاری کا منصوبہ بنایا ہے ،کمپنی کے بورڈ آف ڈائریکٹرز نے ستمبر 2025 کے ایک اجلاس میں مکمل طور پر ملکیتی پرائیویٹ لمیٹڈ سبسڈری قائم کرنے کی منظوری دے دی ہے ،بیسٹ وے گروپ اس نئی کمپنی کے ذریعے آٹو انڈسٹری میں کاروبار اور سرمایہ کاری کرے گا۔بیسٹ وے نے کہا کہ وہ سبسڈری میں 4 ارب روپے تک کی ایکویٹی شامل کرنے اور 6 ارب روپے تک کا شیئر ہولڈر قرض فراہم کرنے کا ارادہ رکھتی ہے، جو کمپنیز ایکٹ 2017 کی سیکشن 199 اور متعلقہ ضوابط کے تحت شیئر ہولڈرز کی منظوری سے مشروط ہوگا،واضح رہے کہ بیسٹ وے گروپ کے تحت 1993 میں سیمنٹ کمپنی قائم کی گئی تھی ۔اس کمپنی کی اکثریتی ملکیت بیسٹ وے انٹرنیشنل ہولڈنگز لمیٹڈ کے پاس ہے، جس کا حصہ 56.43 فیصد ہے، اور یہ یوکے میں قائم بیسٹ وے گروپ لمیٹڈ کا حصہ ہے۔بیسٹ وے گروپ نے آٹو انڈسٹری میں ترقی کو سامنے رکھتے ہوئے یہ اعلان کیا ہے ،اس وقت پاکستان کے آٹو سیکٹر میں بحالی دیکھنے میں آ رہی ہے۔ اگست 2025 میں کاروں کی فروخت 2024 کی نسبت 62 فیصد اور جولائی کی نسبت 27 فیصد بڑھ کر 14,050 یونٹس تک پہنچ گئی، انڈسٹری ذرائع کے مطابق بیسٹ وے گروپ پاکستان میں الیکٹرک گاڑیاں متعارف کرائے گا
