کراچی (نیوز لیب رپورٹ)نیشنل سائبر کرائم انویسٹی گیشن ایجنسی ( این سی سی آئی اے ) نے عوام کی آگہی کے لئے اعلان کیا ہے کہ پاکستان میں آن لائن جوا،اور کیسینو چلانے والی تمام ایپ غیر قانونی ہیں ،اس سلسلے میں این سی سی آئی اے نے پاکستان بھر میں 46 موبائل ایپلی کیشنز کی نشاندہی کی ہے جو کہ جوئے اور کیسینو کے آن لائن پلیٹ فارم ہیں ، این سی سی آئی اے نے کہا ہے کہ یہ تمام ایپ غیر قانونی ہیں اور ان پلیٹ فارمز کے خلاف کارروائی کی جا رہی ہے،ادارےنے انکشاف کیا کہ ملکی قوانین کی خلاف ورزی کرتے ہوئے کام کرنے والی یہ ایپس بڑے پیمانے پر آن لائن بیٹنگ اور کیسینو طرز کے گیمنگ کی سہولت فراہم کر رہی تھیں۔ جوئے کی سب سے زیادہ استعمال ہونے والی ایپلی کیشنز جیسے1
1xBet، Chicken Road، Aviator Games، Dafabet، 22Bet، Casumo، Rabona، 10Cric، Plinko، اور Bet365 شامل ہیں۔ ای سی سی آئی اے نے کہا کہ ایسی ایپس نہ صرف سٹے بازی کو فروغ دیتی ہیں بلکہ ڈیجیٹل پلیٹ فارم کے ذریعے غیر منظم مالیاتی سرگرمیوں کی حوصلہ افزائی کرتی ہیں۔جوئے کے سوفٹ ویئر کے علاوہ، فہرست میں غیر منظم فاریکس اور بائنری ٹریڈنگ پلیٹ فارم بھی شامل ہیں۔ حکام کے مطابق یہ پلیٹ فارم مناسب نگرانی کے بغیر کام کر رہے تھے، جس سے مالیاتی فراڈ اور رقم کی غیر قانونی منتقلی کے خدشات بڑھ رہے تھے۔ ایجنسی نے اس بات پر زور دیا کہ یہ خدمات مالی تحفظ کے لیے ایک بڑا خطرہ ہیں۔NCCIA نے ایسی ایپلی کیشنز کی موجودگی کو بھی اجاگر کیا جو شہریوں کی ذاتی معلومات جمع کرتی ہیں، سم کارڈ اور موبائل نمبر کی تفصیلات حاصل کرنا ان کا ہدف ہوتا ہے۔ حکام نے خبردار کیا کہ ایسی ایپس پرائیویسی کی خلاف ورزیوں، حساس ڈیٹا کا غلط استعمال اور ممکنہ شناخت کی چوری کا باعث بن سکتی ہیں۔ غیر قانونی فہرست میں ان ایپس کا شامل ہونا غیر مجاز ڈیٹا اکٹھا کرنے کے خطرات کو واضح کرتا ہے،این سی سی آئی اے حکام کا کہنا ہے کہ انھوں نے اس سلسلے میں باضابطہ طور پر پاکستان ٹیلی کمیونیکیشن اتھارٹی (PTA) سے رابطہ کیا ہے تاکہ ان ایپس کو فوری طور پر بلاک کیا جائے۔ حکام نے شہریوں پر زور دیا کہ وہ چوکس رہیں اور غیر تصدیق شدہ ایپس کو ڈاؤن لوڈ کرنے یا ان کے ساتھ رابطوں اور گیم کھیلنے سے گریز کریں ،کیونکہ خطرہ ہے کہ ان ایپس پر گیم کھیلنے یا ان پر رجسٹریشن سے جہاں ان کو مالی نقصان ہو سکتا ہے ،وہاں ان کا ذاتی ڈیٹا بھی دوسروں کے پاس جا سکتا ہے
