کراچی ( نیوز لیب رپورٹ ) شہباز حکومت اپنی تمام تر کوششوں کے باوجود غیر ملکی سرمایہ کاروں کو پاکستان میں سرمایہ کاری پرراغب کرنے میں ناکام رہی ہے ،اسٹیٹ بینک کے اعدا د و شمار اس کی تصدیق کرتے ہیں،مرکزی بینک کے اعداد و شمار کے مطابق رواں مالی سال کے 7 ماہ جولائی 2025 سے جنوری 2026 کے دوران براہ راست غیر ملکی سرمایہ کاری میں 51 فیصد کی کمی ریکارڈ کی گئی ہے ،اسٹیٹ بینک کے مطابق 7 ماہ میں براہ راست غیر ملکی سرمایہ کاری (ایف ڈی اے )69 کروڑ 40 لاکھ ڈالر تھی جبکہ گذشتہ مالی سال کے اسی عرصے میں یہ ایک ارب 42 کروڑ 90 لاکھ ڈالر تھی اس طرح 7 ماہ میں51.43 فیصد کی کمی سے 73کروڑ 50 لاکھ ڈالر کی کمی ریکارڈ کی گئی ، پاکستان میں کام کرنے والی ملٹی نیشنل کمپنیوں نے مالی سال 2025-26 کے 7 ماہ میں اپنے مرکزی دفاتر کو 1.68 ارب ڈالر منافع منتقل کیا، جو کہ گذشتہ سال کے اسی عرصے میں ریکارڈ شدہ 1.33 ارب ڈالر سے 26 فیصد زیادہ ہے۔ جنوری 2026 میں پاکستان میں کام کرنے والی ملٹی نیشنل کمپنیوں میں پاور سیکٹر نے سب سے زیادہ منافع منتقل کیا، جو 41.1 ملین ڈالر رہا، اس کے بعد ٹرانسپورٹ سیکٹر کی کمپنیاں 24.5 ملین ڈالر ۔ فوڈ سیکٹر کی کمپنیاں 18.7 ملین ڈالر اور کمیونیکیشن سیکٹر کی کمپنیوں نے 14.6 ملین ڈالر منتقل کئے ہیں
