کراچی ( نیوز لیب رپورٹ) عالمی کشیدگی کے باعث کرنسی کی بجائے قیمتی دھاتوں میں سر مایہ کاری کے بڑھتے رحجان نے سونے اور چاندی کی قیمت کو تاریخ کی بلند ترین سطح پر پہنچا دیا ہے ،آل پاکستان صرافہ جیم اینڈ جیولرز ایسوسی ایشن کی جاری کردہ رپورٹ کے مطابق پاکستان میں24 قیراط خالص سونے کی قیمت 12 ہزار 700 روپے فی تولہ کے اضافےسے ملکی تاریخ میں پہلی مرتبہ 5 لاکھ کی حد بھی عبور کر گئی ہے ،رپورٹ کے مطابق عالمی مارکیٹ میں سونے کی قیمت 127 ڈالر فی اونس کے اضافے سے 4713 ڈالر سے بڑھ کر 4840 ڈالر کی ریکارڈ سطح پر پہنچ گئی ہے ،عالمی مارکیٹ میں اضافے کی وجہ سے مقامی مارکیٹ میں بھی سونے کی قیمت 12ہزار 700 روپے فی تولہ کے اضافے سے 5 لاکھ 6 ہزار 362 روپے فی تولہ اور 10 گرام سونے کی قیمت 10888 روپے کے اضافے سے 4 لاکھ 34 ہزار 123 روپے ہو گئی ہے ،ایسوسی ایشن رپورٹ کے مطابق عالمی مارکیٹ میں چاندی کی قیمت 0.64 ڈالر کے اضافے سے 94.58 ڈالر فی اونس ہو گئی ہے جبکہ مقامی مارکیٹ میں چاندی کی قیمت 64 روپے فی تولہ کے اضافے سے 9933 روپے فی تولہ کی تاریخی سطح پر پہنچ گئی ہے
