کراچی ( نیوزلیب رپورٹ)فیڈرل بورڈ آف ریونیو (ایف بی آر ) کی سندھ کی بااثر شخصیت کی شوگر مل کے خلاف کاروائی سے ہلچل ، چینی کی بوریوں سے لدے 3ٹرک ضبط ،ٹریک اینڈ ٹریس سسٹم کی جعلی اسٹیمپ لگا کر ٹیکس چوری کی جارہی تھی،ایف بی آر کا کہنا ہے کہ اطلاع ہے کہ ایف بی آر کے جعلی ٹریک اینڈ ٹریس سسٹم (ٹی ٹی ایس ) کی اسٹیمپس والے یہ ٹرک چیمبرشوگر ملز سے نکلے تھے،قارئین کی اطلاع کے لئے یہ بتانا ضروری ہے کہ ٹنڈو الہ یار میں واقع چیمبر شوگر مل اومنی گروپ کی ملکیت ہے ،اومنی گروپ کے انور مجید ملک کے سب سے بڑے عہدے پرفائز شخصیت کے انتہائی قریب سمجھے جاتے ہیں ،اس طرح ایف بی آر نے درحقیقت ایک بہت بڑی کاروائی کرکے ہلچل مچا دی ہے،ایف بی آر کی ویب سائٹ پر دی گئی اطلاع کے مطابق ریجنل ٹیکس آفس -2کراچی نےچمبرشوگر مل کی جانب سے ٹیکس چوری کی ایک کوشش ناکام بنا دی،ایف بی آر کے کے مطابق ریجنل ٹیکس آفس2کراچی نے ان لینڈ ریونیو انٹیلیجنس اینڈ انویسٹی گیشن کے اشتراک سے کی گئی ایک کارروائی میں جعلی ٹریک اینڈ ٹریس سسٹم( ٹی ٹی ایس ) اسٹیمپس والے 3 ٹرکوں کو ضبط کر لیا ،ان ٹرکوں پر 1,800 بوریاں لدی ہوئی ہیں ،جو کہ ضبط کر لی گئیں ،یہ کارروائی قومی شاہراہ پر واقع سسی ٹول پلازہ پر کی گئی ۔ ضبط کیے جانے والے ٹرکوں کے رجسٹریشن نمبرزٹی کے اے 042،ایس ڈی اے۔899 اوراے ای 1488ہیں۔ ایف بی آر کا کہنا ہے کہ یہ کاروائی ٹریک اینڈ ٹریس نظام پر عملدرآمد کو یقینی بنانے، ٹیکس چوری کی روک تھام اور اشیائے ضروریہ کی غیر قانونی نقل و حرکت کو روکنے کی جاری کوششوں کا حصہ ہے۔ جعلی ٹی ٹی ایس اسٹیمپس کی نشاندہی پر گاڑیوں کو فوری طور پر تحویل میں لے کر مزید تفتیش اور ضروری قانونی کارروائی کے لیے آر ٹی او-2، کے نیپا پر منتقل کر دیا گیا۔ جبکہ مزید کارروائی متعلقہ قوانین اور ضوابط کے مطابق عمل میں لائی جائے گی۔
