کراچی ( نیوز لیب رپورٹ )پاکستانی کینڈی ،چاکلیٹ اور بسکٹ اب یورپ میں بھی دستیاب ہو نگے ،جی ہاں سابق وزیر خزانہ مفتاح اسماعیل کی فیکٹری، اسماعیل انڈسٹریز لمیٹڈ (آئی ایس آئی ایل) جو کنفیکشنری مصنوعات تیار کرتی ہے نے اسپین میں اپنی مکمل ملکیتی ذیلی کمپنی قائم کرنے کا اعلان کر دیا ہے ،اسماعیل انڈسٹریز لمیٹڈ، کینڈی لینڈ اور بسکونی اسنیکس بنانے والی کمپنی ہے، کمپنی کا کہنا ہے کہ وہ یورپ کے راستے یورپی مارکیٹس میں داخل ہونے کے اپنے منصوبے کے تحت اسپین میں ایک مکمل ذیلی کمپنی قائم کر رہی ہے ،کمپنی کے بورڈ نے پاکستان اسٹاک ایکسچینج میں جمع کرائے گئے ایک نوٹس میں بتایا ہے کہ کمپنی کے بورڈ آف ڈائریکٹرز نے اسپین میں ذیلی کمپنی قائم کرنے کا فیصلہ کیا ہے،تاہم توسیع کا انحصار ریگولیٹری منظوریوں پر ہے۔اسماعیل انڈسٹریز نے کہا کہ اسپین کا یہ یونٹ یورپی یونین (EU) کے لیے ایک گیٹ وے کے طور پر کام کرے گا، جو دنیا کی سب سے بڑی صارف منڈیوں میں سے ایک ہے، اور یہ اس کی طویل مدتی حکمت عملی میں ایک سنگ میل ہے تاکہ اپنے عالمی اثر و رسوخ کو بڑھایا جا سکے۔کراچی میں اسماعیل انڈسٹریز لمیٹڈ کو پاکستان میں 1988 میں پرائیویٹ لمیٹڈ کمپنی کے طور پر قائم کیا گیا تھااور 1989 میں اسے پبلک لمیٹڈ کمپنی میں تبدیل کردیا گیا۔کمپنی کینڈی، بسکٹ، آلو کے چپس اور پیکیجنگ فلمز تیار کرتی ہے، جو کینڈی لینڈ، بسکونی، اسنیک سٹی اور ایسٹرو فلمز جیسے برانڈز کے تحت مارکیٹ میں دستیاب ہیں۔ ،یہاں یہ بتانا بھی ضروری ہے کمپنی نے گذشتہ سال ابوظہبی، متحدہ عرب امارات میں ایک مکمل ذیلی ادارہ قائم کرنے کا بھی اعلان کیا تھا
