کراچی ( نیوز لیب رپورٹ )کراچی میں پانی کی منصفانہ اور شفاف فراہمی کو یقینی بنانے کے لئے تمام رجسٹرڈ واٹر ٹینکرز پر جدیدبارکوڈ سسٹم متعارف کرانے کا فیصلہ، نئے سسٹم سے شہری چند سیکنڈ میں معلوم کر سکیں گے کہ ٹینکر قانونی ہے یا غیر قانونی، میئر کراچی مرتضی وہاب نےایک ویڈیو پیغام میں شہر میں پانی کی ترسیل کے نظام کو مزید شفاف اور موثربنانے کے لیے تمام رجسٹرڈ واٹر ٹینکرز پر جدیدبارکوڈ سسٹم متعارف کرانے کا اعلان کرتے ہوئے کہا ہے کہ اب شہری آسانی سے یہ معلوم کر سکیں گے کہ ان کے گھر پانی فراہم کرنے والا ٹینکر قانونی ہے یا غیر قانونی، میئر کراچی نے کہا کہ شہر کے تمام رجسٹرڈ واٹر ٹینکرز پر منفرد بارکوڈ نصب کر دیے گئے ہیں، جنہیں موبائل فون سے اسکین کرتے ہی ٹینکر کی رجسٹریشن، ڈرائیور کی شناخت، تصویر، روٹ، فٹنس سرٹیفکیٹ اور اس میں پانی کی مقدارسمیت دیگر اہم معلومات فوری طور پر سامنے آ جائیں گی۔ اس جدید نظام کا بنیادی مقصد غیر قانونی واٹر ٹینکر مافیا کی حوصلہ شکنی، پانی کی ترسیل میں شفافیت پیدا کرنا اور شہریوں کو مستند معلومات فراہم کرنا ہے تاکہ صرف رجسٹرڈ اور مجاز ٹینکرز ہی پانی کی فراہمی کا کام انجام دیں۔مرتضی وہاب نے شہریوں سے اپیل کی کہ وہ اپنے گھروں پر آنے والے واٹر ٹینکر کا بارکوڈ ضرور اسکین کریں اور اگر کوئی ٹینکر غیر رجسٹرڈ یا مشکوک معلوم ہو تو متعلقہ اداروں کو فوری اطلاع دیں تاکہ اس کے خلاف قانونی کارروائی کی جا سکے۔ بارکوڈ سسٹم کے ذریعے رجسٹرڈ ٹینکرز کی مکمل معلومات عوام کے موبائل فون پر دستیاب ہوں گی، جس سے نہ صرف غیر قانونی واٹر سپلائی کی روک تھام میں مدد ملے گی بلکہ شہریوں کا اعتماد بھی بحال ہوگا۔میئر کراچی کے مطابق یہ اقدام شہر میں پانی کی منصفانہ اور شفاف فراہمی کو یقینی بنانے کے ساتھ ساتھ غیر قانونی واٹر ٹینکر مافیا کے خلاف جاری کارروائیوں کو مزید موثربنانے کی جانب ایک اہم پیش رفت ہے۔
